Ichki ishlar vazirligi Tezkor-qidiruv departamenti tomonidan Toshkent viloyati va poytaxt yo‘nalishida harakatlanuvchi taksi haydovchilaridan noqonuniy ravishda pul undirib kelgan uyushgan jinoiy guruh faoliyatiga chek qo‘yildi.
Aniqlanishicha, “Bichok” laqabli shaxs boshchiligidagi guruh a’zolari uzoq vaqt davomida taksi haydovchilarini tahqirlab, ularga nisbatan zo‘ravonlik va qo‘rqitish usullarini qo‘llagan holda, har oy muntazam ravishda noqonuniy ulush talab qilib kelgan.
Jinoiy guruh haydovchilarning Toshkent viloyati va Toshkent shahri o‘rtasida erkin faoliyat yuritishiga to‘sqinlik qilib, bosim orqali ularni pul to‘lashga majbur qilgan.
O‘tkazilgan tezkor-qidiruv tadbirlari natijasida mazkur uyushgan jinoiy guruhning noqonuniy faoliyati to‘liq fosh etilib, uning a’zolari qo‘lga olindi.
Hozirda mazkur holat yuzasidan tergov harakatlari olib borilmoqda, jinoiy guruh faoliyatiga oid barcha holatlar va qo‘shimcha epizodlar aniqlanmoqda.