O‘zbekistonda transport vositalari uchun ro‘yxatdan o‘tkazish guvohnomasi — “texpasport”larga oid yangi tartib kuchga kirdi. Hukumat qaroriga muvofiq, endilikda ushbu hujjat 5 yil muddatga beriladi va muddati tugagach majburiy ravishda yangilanadi, deya manba xabar beradi.
Texpasport narxi qancha etib belgilandi?
Yangi yoki yangilangan texpasport uchun to‘lov Bazaviy hisoblash miqdorining 6,84 baravari miqdorida belgilandi. Hozirgi hisob-kitoblarga ko‘ra, bu summa 2 818 080 so‘mni tashkil etadi.
Haydovchilik huquqini boshqalarga berish qanday ishlaydi?
Endilikda avtomobil egasi transport vositasini boshqarish huquqini boshqa shaxsga rasmiy ravishda o‘tkazishi mumkin. Buning uchun Yo‘l harakati xavfsizligi xizmatiga maxsus tartibda xabar berish talab etiladi.
Ariza qayer orqali topshiriladi?
Ushbu xizmatdan foydalanish uchun Yagona interaktiv davlat xizmatlari portali (my.gov.uz) yoki Yo‘l harakati xavfsizligi xizmati tomonidan boshqariladigan “SafeRoad” mobil ilovasi orqali ariza yuborish mumkin.
Jarimalar kimga rasmiylashtiriladi?
Transportni boshqarish huquqini olgan shaxs arizani tasdiqlashi va kelgusida sodir etiladigan qoidabuzarliklar uchun javobgarlikni o‘z zimmasiga olishi lozim. Tasdiqlash elektron raqamli imzo, Mobile-ID yoki Face-ID orqali amalga oshiriladi.
Xizmat uchun to‘lov qancha?
Ushbu bildirishnoma xizmatidan foydalanish uchun Bazaviy hisoblash miqdorining 10 foizi, ya’ni 41 200 so‘m miqdorida to‘lov undiriladi.