Yangi pullik yo‘l qurilishi haqida nimalar ma’lum?
O‘zbekistonda Urganch va Xiva shaharlarini bog‘laydigan birinchi pullik avtomobil yo‘li qurilishi boshlandi. Loyiha haqida O’zbekiston 24 telekanali xabar berdi. Mazkur trassa Xorazm viloyati infratuzilmasida muhim bosqich hisoblanadi.
Xorazm viloyati Avtomobil yo‘llari qo‘mitasi boshqarmasi boshlig‘i Dilshod Niyazmetovning ta’kidlashicha, yo‘l xalqaro talablarga muvofiq qurilmoqda.
Trassaning texnik ko‘rsatkichlari qanday?
To‘rt polosali asfalt-beton qoplamali yo‘lning umumiy uzunligi 35 kmni tashkil etadi. Amaldagi yo‘l 34 km bo‘lsa, yangi loyiha 1 kmga uzunroq bo‘ladi. Uning o‘tkazuvchanlik quvvati kuniga 20 mingdan ortiq transport vositasiga yetadi.
Yo‘l qoplamasining umumiy qalinligi taxminan 87 smni tashkil qiladi. Yuqori ikki qatlam modifikatsiyalangan bitum asosidagi mustahkam materiallardan barpo etiladi.
Safar vaqti qanday o‘zgaradi?
“Yo‘l-Loyiha Byurosi” davlat kompaniyasi direktori G‘ulom Zoxidovning ma’lum qilishicha, yangi trassa safar vaqtini uch baravar qisqartiradi. Hozirda yo‘l taxminan bir soat vaqt olsa, yangi avtomagistral orqali masofani atigi 17 daqiqada bosib o‘tish mumkin bo‘ladi.
Loyiha doirasida qanday inshootlar quriladi?
35 kmli loyiha beshta lotga bo‘lingan bo‘lib, 17 ta ko‘prik, 8 ta yo‘l o‘tkazgich, 1 ta tunnel va 5 ta maxsus o‘tish joyi barpo etilishi rejalashtirilgan.
Trassaning boshida, o‘rtasida va oxirida terminallar hamda ikki servis hududi quriladi. Shuningdek, hayvonlar uchun alohida o‘tish joylari va aholi punktlari kesishmalarida yo‘l o‘tkazgichlar tashkil etiladi.
Qanday zamonaviy texnologiyalar qo‘llaniladi?
Turkiyalik muhandis Bulent Bayirning aytishicha, transport oqimini boshqarish sun’iy intellekt asosidagi raqamli tizimlar orqali amalga oshiriladi. Ushbu tizimlar yuk mashinalari, avtobuslar, mikroavtobuslar, yengil avtomobillar va boshqa transport turlarini aniqlay oladi.
Yer osti suvlari yaqinligi sababli yo‘l bo‘ylab kollektorlar va zamonaviy drenaj tizimlarini qurish ham ko‘zda tutilgan.
Loyihaning qiymati va ahamiyati nimada?
Loyihaning umumiy qiymati 120 million dollar deb baholanmoqda. Yangi avtomagistral Xivani to‘g‘ridan-to‘g‘ri Urganch aeroporti bilan bog‘laydi hamda turizm sohasi va mahalliy aholi uchun mavjud transport muammolarini kamaytiradi.
Avvalroq Bektemir — Chorvoq yo‘lining olti uchastkasida maksimal tezlik 80 km/soatgacha pasaytirilishi haqida ham xabar berilgandi.