O‘zbekiston Respublikasi Markaziy banki Boshqaruvining 2026-yil 15-yanvardagi 1/1-sonli qaroriga asosan “Yangi bank” aksiyadorlik jamiyatiga bank faoliyatini amalga oshirish huquqini beruvchi litsenziya bekor qilindi.
Ushbu qaror bank faoliyatida aniqlangan kamchiliklarni bartaraf etish bo‘yicha ko‘rilgan choralar yetarli darajada samara bermagani bilan izohlanadi. Xususan, ustav kapitali miqdori amaldagi qonunchilikda belgilangan eng kam talablar darajasiga yetkazilmagan, shuningdek, banklar va bank faoliyatiga oid ayrim majburiy talablar bajarilmagan.
“O‘zbekiston Respublikasining Markaziy banki to‘g‘risida”, “Banklar va bank faoliyati to‘g‘risida” hamda “Banklarni sanatsiya qilish va tugatish to‘g‘risida”gi qonunlarga muvofiq, “Yangi bank” AJ faoliyatini belgilangan tartibda tugatish to‘g‘risida qaror qabul qilindi. Shu bilan birga, tugatish komissiyasi tayinlanib, bankni tugatish jarayonini boshqarish vakolatlari unga yuklatildi.
O‘zbekiston Respublikasining “Banklardagi omonatlarni himoya qilish kafolatlari to‘g‘risida”gi Qonuniga binoan, jismoniy va yuridik shaxslarning banklardagi omonatlari davlat tomonidan qonunchilikda belgilangan miqdorlarda kafolatlanadi.
Shu munosabat bilan, “Yangi bank” aksiyadorlik jamiyatidagi omonatchilarning kafolatlangan omonatlari bo‘yicha kompensatsiya Omonatlarni kafolatlash agentligi tomonidan amaldagi qonunchilikka muvofiq tartibda va belgilangan miqdorlarda to‘lab beriladi.
Omonat mablag‘lari bo‘yicha kompensatsiya to‘lovlariga oid batafsil ma’lumotni Omonatlarni kafolatlash agentligining 55-550-05-00 raqamli ishonch telefoni orqali olish mumkin.
Alohida qayd etilishicha, dastlabki hisob-kitoblarga ko‘ra, mavjud 32 526 nafar omonatchining 32 153 nafariga kafolatlangan omonat summalari to‘liq qaytariladi. Omonatlarni qaytarish bo‘yicha yakuniy va aniq hisob-kitoblar Omonatlarni kafolatlash agentligi tomonidan e’lon qilinadi.
Qolgan 373 nafar omonatchi bo‘yicha kafolatlangan summadan ortiq mablag‘lar tugatish komissiyasining qaroriga asosan, qonunchilikda belgilangan tartibda qaytarilishi ko‘zda tutilgan.
Mazkur jarayon O‘zbekiston Respublikasi Markaziy bankining doimiy nazoratida bo‘lib, barcha bosqichlar ketma-ket kuzatib boriladi hamda jamoatchilikka muntazam ravishda rasmiy axborot taqdim etiladi.