Yig‘ilishda qanday asosiy vazifalar belgilandi?
7-aprel kuni Shavkat Mirziyoyev raisligida jismoniy tarbiya va sport sohasining ustuvor yo‘nalishlariga bag‘ishlangan yig‘ilish bo‘lib o‘tdi. Unda har bir vazir, tarmoq rahbari, bank boshliqlari va hokimlar xodimlar uchun sport bilan shug‘ullanish sharoitlarini kengaytirishda shaxsan namuna bo‘lishi kerakligi ta’kidlandi.
Davlat tashkilotlarida sport qanday yo‘lga qo‘yiladi?
Endilikda haftada bir kun “sport kuni” sifatida belgilanadi. Shu kuni barcha vazirlik va idoralarda sport mashg‘ulotlari tashkil etiladi. Agar sport zallari mavjud bo‘lmasa, sport bazalari yoki federatsiyalar bilan hamkorlik qilish talab etiladi.
Shuningdek, kamida 4 ta sport turi bo‘yicha yiliga ikki marta musobaqalar o‘tkazilib, g‘oliblar rag‘batlantiriladi.
Tadbirkorlar uchun qanday imtiyozlar beriladi?
Xususiy sektorda ommaviy sportni rivojlantirish uchun qo‘shimcha imkoniyatlar yaratiladi. Tadbirkorlar xodimlari uchun sport zali yoki maydoncha qurish va jihozlash xarajatlarini foyda solig‘i bazasidan chegirib tashlashi mumkin bo‘ladi.
Shu bilan birga, jalb qilingan murabbiylar uchun daromad solig‘i va ijtimoiy soliq atigi 1 foiz etib belgilanadi.
Aholini sportga jalb qilish qanday amalga oshiriladi?
“Mahalla – maktab – sport muassasasi – federatsiya” zanjiri asosida yangi tizim joriy etiladi. Bu orqali aholining sportga qamrovi kengaytiriladi va iqtidorli yoshlarni aniqlash kuchaytiriladi.
Shu maqsadda 9 mingta mahalla 26 ta federatsiya rahbarlariga biriktirilib, maktab to‘garaklari zarur sport anjomlari bilan ta’minlanadi.
Talabalar uchun qanday imkoniyatlar yaratiladi?
Sport yo‘nalishidagi oliygoh talabalariga dual ta’lim tizimi joriy qilinadi. 2–3-bosqich talabalarining yarmi va 4-bosqich talabalarining barchasi maktablarda murabbiylik amaliyotini o‘taydi.
Ularga avtomatik ravishda murabbiylik sertifikati beriladi, sport to‘garaklaridan tushgan mablag‘ning 50 foizi esa talabaga ajratiladi. Bitiruvchilarga diplom bilan birga hakamlik sertifikati ham beriladi.
Qanday yangi texnologiyalar joriy etiladi?
Sun’iy intellekt yordamida sportchilar va murabbiylar natijalarini tahlil qiladigan hamda mashg‘ulot rejalarini shakllantiradigan maxsus platforma ishlab chiqiladi.
Ilmiy faoliyat qanday rag‘batlantiriladi?
Endilikda sport sohasidagi ilmiy ishlar amaliy natijaga yo‘naltiriladi. Agar tadqiqotlar sportchilar natijasini yaxshilasa va xalqaro musobaqalarda muvaffaqiyatlarga olib kelsa, mualliflarga 100 million so‘m mukofot beriladi.
Yangi tizimdan qanday natija kutilmoqda?
Mutasaddilarga joriy yil davomida muntazam sport bilan shug‘ullanuvchilar sonini ikki barobarga oshirib, 1 million nafarga yetkazish vazifasi yuklatildi.
Shuningdek, barcha jarayonlarni raqamlashtirish va “Besh tashabbus” kabi musobaqalarni shaffof tizim asosida tashkil etish zarurligi qayd etildi.