Mujtaba Xomeneiy qanday qilib omon qoldi?
Ma’lumotlarga ko‘ra, Eronning yangi diniy rahbari Mujtaba Xomeneiy 28 fevral kuni AQSh va Isroil tomonidan amalga oshirilgan zarbadan sal oldin binoni tark etgani sababli omon qolgan.
Bu haqda Ali Xomenei devoni protokol xizmati rahbari Mazohir Husayniy tomonidan Islom inqilobi muhofizlari korpusi qo‘mondonlariga yo‘llangan murojaat audioyozuvi asosida The Telegraph nashri xabar tarqatgan.
Zarba vaqtida u qayerda bo‘lgan?
Xabar qilinishicha, Mujtaba Xomeneiy o‘sha paytda rafiqasi va o‘g‘li bilan birga otasining joylashgan majmuasida bo‘lgan. 28 fevral kuni ertalab u bir ish bilan hovliga chiqqan va portlash sodir bo‘lgan paytda tashqarida bo‘lgan.
«U bir ish qilish uchun hovliga chiqqan edi. Ko‘chada bo‘lgan va yuqoriga qarab ketayotgan paytda binoga raketa kelib urildi», — deyiladi murojaatda.
U qanday jarohat olgan?
Mazohir Husayniyning ta’kidlashicha, portlash natijasida Mujtaba Xomeneiy oyog‘idan yengil jarohat olgan. Shuningdek, hujum muvofiqlashtirilgan bo‘lib, majmuaning bir nechta obyektlariga bir vaqtning o‘zida zarba berilgan.
Taxminlarga ko‘ra, hujum butun Xomeneiy oilasini yo‘q qilishni ko‘zlagan bo‘lishi mumkin.
Turli tomonlar bu holatga qanday munosabat bildirdi?
The Telegraph ma’lumotiga ko‘ra, ushbu audioyozuv yangi rahbarning salomatligi va u mamlakatni boshqara oladimi yoki yo‘qmi degan savollar kuchaygan bir paytda tarqalgan.
Urush boshlanganidan buyon Mujtaba Xomeneiy jamoatchilik oldida ko‘rinish bermagan, ikki hafta ichidagi ilk bayonotini esa yozma shaklda e’lon qilgan.
AQSh mudofaa vaziri Pit Hegset uning zarba vaqtida jarohat olgani va ehtimol tashqi ko‘rinishiga zarar yetganini bildirgan. Biroq Eron tashqi ishlar vaziri Abbos Aroqchi bunga javoban yangi oliy rahbar sog‘lom ekanini va vaziyatni to‘liq nazorat qilayotganini ta’kidlagan.
AQSh qanday choralar ko‘rmoqda?
Ma’lumotlarga ko‘ra, AQSh Mujtaba Xomeneiy haqida aniq ma’lumot taqdim etgan shaxsga 10 million dollargacha mukofot va’da qilgan.