Prezident farmoniga muvofiq, 2025-yil 31-dekabr barcha xodimlar uchun, ish haftasi turidan qat’i nazar, dam olish kuni etib belgilandi.
2026-yilda quyidagi qo‘shimcha dam olish kunlari belgilanadi:
- Barcha xodimlar uchun: 2-yanvar (juma), 28-may (payshanba), 29-may (juma), 31-avgust (dushanba)
- Olti kunlik ish haftasida ishlovchilar uchun: 3-yanvar (shanba), 30-may (shanba), 31-dekabr (payshanba)
Mehnat kodeksiga muvofiq, 2026-yilda dam olish kunlariga to‘g‘ri kelgan ayrim bayram kunlari quyidagi dushanbalarga ko‘chirildi:
- 8-mart (Xalqaro xotin-qizlar kuni) → 9-mart
- 21-mart (Navro‘z bayrami) → 23-mart
- 9-may (Xotira va qadrlash kuni) → 11-may
Farmonda ishlab chiqarish, texnik yoki tashkiliy sabablarga ko‘ra faoliyati to‘xtatilishi mumkin bo‘lmagan ish turlari uchun, jumladan uzluksiz ishlab chiqarish, aholiga kundalik xizmat ko‘rsatish va smenali ish rejimlarida dam olish kunlarini ko‘chirish tatbiq etilmasligi belgilangan.
Besh kunlik ish haftasida ishlovchi xodimlar uchun 12-dekabr (shanba) kuniga to‘g‘ri kelgan dam olish kuni 2026-yil 31-dekabr (payshanba) kuniga ko‘chirildi.
Bayram va dam olish kunlarining uzaytirilishini inobatga olgan holda, aholining mazmunli hordiq chiqarishini ta’minlash maqsadida tegishli tashkilotlarga chegirmalar va aksiyalar tashkil etish tavsiya etildi:
- turistik obyektlar, madaniy meros maskanlari, muzeylar va mehmonxonalar bo‘yicha
- sanatoriylar va sog‘lomlashtirish maskanlari xizmatlari bo‘yicha
- ichki avia va temiryo‘l qatnovlari bo‘yicha