O‘zbekiston Respublikasi Adliya vazirligi Markaziy bank bilan hamkorlikda kredit va to‘lov tashkilotlari, shuningdek to‘lov tizimi operatorlari tomonidan jismoniy shaxslarga masofadan moliyaviy xizmatlar ko‘rsatishda axborot xavfsizligi va kiberxavfsizlikni ta’minlash hamda frod holatlarining oldini olish bo‘yicha minimal talablar to‘g‘risidagi nizomni davlat ro‘yxatidan o‘tkazdi.
Mazkur hujjat 2026-yil 21-yanvar kuni 3759-son bilan rasman ro‘yxatdan o‘tkazilib, onlayn kreditlar sohasida fuqarolar huquqlarini himoya qilishni kuchaytirishga qaratilgan.
Nizomga muvofiq, agar onlayn kredit firibgarlik natijasida fuqaro nomiga rasmiylashtirilgan bo‘lsa va surishtiruvchi, tergovchi, prokuror qarori yoki sud ajrimi asosida ushbu shaxs jabrlanuvchi deb e’tirof etilsa, kredit tashkiloti mazkur onlayn kredit hamda unga bog‘liq foizlarni hisoblashni va undirishni to‘xtatadi.
Shu bilan birga, kredit tashkiloti onlayn kreditni rasmiylashtirish jarayonida frod holatini sodir etgan shaxsdan yetkazilgan moddiy zararni regress tartibida undirish huquqiga ega.
Kredit tashkilotlari frod holatiga shubha tug‘ilganda, amaldagi qonunchilikda belgilangan tartibda tegishli shikoyat bilan murojaat qilishlari mumkin.
Agar surishtiruv, dastlabki tergov yoki sud qarorlari asosida frod holati mavjud emasligi aniqlansa, kredit tashkiloti onlayn kredit va unga bog‘liq foizlarni hisoblash hamda undirishni belgilangan tartibda davom ettiradi.