12-yanvar kuni Ispaniya politsiyasi harbiy-dengiz kuchlari bilan hamkorlikda ochiq dengiz tarixidagi eng yirik kokain musodarasi deb e’tirof etilgan maxsus operatsiyani amalga oshirdi. Braziliyadan Yevropaga yo‘l olgan kema bortidan 10 tonna giyohvand modda aniqlandi. Kontrabanda Lotin Amerikasida shakllangan transmilliy narkotik tarmoqlarga qarshi kurash fonida amalga oshirilgan bo‘lib, bu jarayon Nikolas Maduro hukmronligi davridagi mintaqaviy beqarorlik bilan ham bog‘liq ekani ta’kidlanmoqda.
Kamerun bayrog‘i ostida harakatlangan kemada kokain tuz yuklari orasiga yashirilgan holda tashilgan. Giyohvand moddalar 294 ta qopga joylangan bo‘lib, yukni niqoblash darajasi operatsiya puxta rejalashtirilganini ko‘rsatadi.
Reyd yakunlanganidan so‘ng kema deyarli 12 soat yoqilg‘isiz holatda ochiq dengizda qolib ketdi. Keyinchalik Ispaniyaning dengiz qutqaruv xizmati uni Kanar orollari hududiga sudrab keldi va tergov ishlari davom ettirildi.
Politsiya ma’lumotiga ko‘ra, operatsiya Janubiy Amerikadan Yevropaga yirik hajmda kokain yetkazib berish bilan shug‘ullangan ko‘pmillatli jinoiy guruhga qarshi qaratilgan. Tarqatilgan videokadrlarda giyohvand moddalar tuz ostidan qo‘l va belkuraklar yordamida qazib olinayotgani, so‘ngra bog‘lamalar port hududiga olib chiqilayotgani aks etgan.
Musodara qilingan kokainning taxminiy bozor qiymati 400 million yevro atrofida baholanmoqda. Shuningdek, kema bortidan o‘qotar qurollar va o‘q-dorilar ham topilgan. Tergov doirasida ekipajning 13 nafar a’zosi hibsga olindi.
Xalqaro amaliyot “White Tide” (“Oq to‘lqin”) deb nomlandi. Unda Ispaniya politsiyasi bilan bir qatorda Dengiz tahlili va operatsiyalari markazi, AQShning Giyohvand moddalarga qarshi kurash boshqarmasi (DEA), Buyuk Britaniya Milliy jinoyatchilik agentligi, Braziliya Federal politsiyasi, Ispaniya razvedka xizmati, shuningdek Fransiya va Portugaliya rasmiylari ishtirok etdi.
Ispaniya huquqni muhofaza qiluvchi organlari ushbu reydni xalqarо narkotik savdosi kanallariga berilgan tarixiy zarba deb atadi. Lotin Amerikasi davlatlari bilan yaqin aloqalar Ispaniyani Yevropa bozoriga giyohvand moddalar kirib kelishidagi asosiy nuqtalardan biriga aylantiradi.
Avvalroq, 2024-yilda, Ispaniya politsiyasi Ekvadordan kelgan konteyner kemasidan 13 tonna kokainni musodara qilgan bo‘lib, bu holat mamlakat tarixidagi eng yirik ko‘rsatkich sifatida qayd etilgan edi.
Manba: Ispaniya politsiyasining rasmiy xabarlari (kun uz).