«Barselona» futbol klubi prezidenti Joan Laporta jamoa yaqin vaqt ichida portugaliyalik himoyachi Joau Kanselu bilan shartnoma imzolashini rasman tasdiqladi. Futbolchi Saudiya Arabistonining «Al-Hilol» klubidan joriy mavsum oxirigacha ijara asosida «ko‘k-anorranglilar» safiga qo‘shiladi.
Klub rahbarining so‘zlariga ko‘ra, Kanselu yaqin kunlarda «Barselona» qarorgohiga yetib keladi va majburiy tibbiy ko‘rikdan o‘tadi. Shundan so‘ng u rasmiy tarzda kataloniyaliklar safida ro‘yxatdan o‘tkaziladi.
«Kanselu ertaga keladi va tibbiy ko‘rikdan o‘tadi. U biz bilan bo‘ladi. Bu — Dekuning navbatdagi muvaffaqiyati. Ushbu transfer oynasida futbolchi bilan shartnoma imzolash har doim oson emas, biroq sport direktori juda yaxshi ish qildi», — dedi Laporta.
Ta’kidlanishicha, «Barselona» futbolchi uchun kechgan kurashda Milanning «Inter» klubini ortda qoldirishga muvaffaq bo‘ldi. Italiyaliklar ham Kanseluga jiddiy qiziqish bildirgan edi.
Eslatib o‘tamiz, Joau Kanselu avval ham «Barselona» sharafini 2023/24 yilgi mavsumda ijara asosida himoya qilgan va o‘z o‘yini bilan ijobiy taassurot qoldirgan.
Manba: ЕВРО-ФУТБОЛ.Ру