Voqea qayerda va qachon sodir bo‘ldi?
10-fevral kuni tushdan keyin Kanadaning Britaniya Kolumbiyasi provinsiyasidagi Tumbler-Ridge shahrida qurolli hujum sodir etildi. Avval xonadonda, keyin esa maktab binosida otishma yuz berdi. Mazkur kichik shaharchada taxminan 2400 nafar aholi istiqomat qiladi va mahalliylarning aytishicha, bu yerda deyarli hamma bir-birini taniydi.
Qurbonlar kimlar bo‘ldi?
Fojia oqibatida sakkiz kishi hayotdan ko‘z yumdi. Maktabda 39 yoshli o‘qituvchi hamda 12–13 yosh oralig‘idagi besh nafar o‘quvchi (uch nafar qiz va ikki nafar o‘g‘il bola) halok bo‘lgan. Uyda esa 39 yoshli ayol va 11 yoshli o‘g‘il bola otib o‘ldirilgan.
Bundan tashqari, 20 dan ortiq inson turli darajadagi tan jarohatlari bilan shifoxonaga yetkazilgan. Ayrim jabrlanuvchilarning ahvoli og‘ir ekani ma’lum qilingan.
Hujumni kim amalga oshirdi?
Huquq-tartibot idoralari ma’lumotiga ko‘ra, hujumni 18 yoshli Jessi Van Rutsellaar sodir etgan. U avval o‘z uyida onasi va tug‘ishgan akasini otib o‘ldirgan, shundan so‘ng to‘rt yil oldin tark etgan sobiq maktabiga borgan.
Favqulodda chaqiruvdan so‘ng voqea joyiga yetib kelgan politsiya xodimlari maktab hududiga kirgan paytda, hujumchi o‘z joniga qasd qilgan. U otishma vaqtida uzun stvolli miltiq va to‘pponchadan foydalangani aytilgan.
Hujumchining shaxsi haqida nimalar ma’lum?
Politsiya bergan ma’lumotlarga ko‘ra, Jessi Van Rutsellaar tug‘ilganda o‘g‘il bola sifatida ro‘yxatga olingan, biroq taxminan olti yil avval transgender o‘tish jarayonini boshlagan. Kundalik hayotda va ijtimoiy tarmoqlarda u o‘zini qiz sifatida tanishtirgan.
Tergovchilar hozircha uning gender o‘ziga xosligi bilan hujum o‘rtasida bog‘liqlik borligini tasdiqlovchi dalil topmaganini bildirgan.
Oldindan ogohlantiruvchi belgilar bo‘lganmi?
Ma’lum qilinishicha, ushbu xonadon bilan bog‘liq holatlar sababli avval ham bir necha bor politsiyaga murojaatlar bo‘lgan. Ayrim chaqiruvlar gumonlanuvchining ruhiy salomatligi bilan bog‘liq masalalar tufayli amalga oshirilgan.
U psixiatriya tekshiruviga yuborilgani ham ochiqlangan. Bir paytlar uyidan qonuniy asosda saqlanayotgan o‘qotar qurol olib qo‘yilgan, biroq keyinchalik qaytarib berilgan.
Rasmiy ma’lumotlarga ko‘ra, Van Rutsellaar ilgari qurol saqlash litsenziyasiga ega bo‘lgan, ammo uning amal qilish muddati 2024-yilda tugagan. Uning nomiga biror qurol ro‘yxatdan o‘tkazilmagani aytilmoqda. Hodisa joyidan topilgan qurollarning kimga tegishli ekani aniqlashtirilmoqda.
Hujum sabablari aniqlanganmi?
Tergov davomida na xayrlashuv xati, na hujum motivini ochib beruvchi boshqa yozma yoki og‘zaki dalillar topilgan. Shuningdek, uning maktab davrida transgender o‘tish bilan bog‘liq zo‘ravonlikka uchragani haqida ham tasdiqlangan ma’lumot yo‘q.
Politsiya ma’lumotiga ko‘ra, u yakka harakat qilgan va ehtimol, aniq bir shaxsni nishonga olmagan.
Rasmiylarning munosabati qanday bo‘ldi?
Kanada bosh vaziri Mark Karni halok bo‘lganlarning yaqinlariga hamdardlik bildirgan. Mamlakat bo‘ylab motam belgisi sifatida bayroqlar tushirilgan, parlament esa qurbonlar xotirasiga bir daqiqalik sukut saqlagan.
Ta’kidlanishicha, Tumbler-Ridge shahridagi ushbu fojea Kanada tarixidagi eng yirik ommaviy qotilliklardan biri sifatida qayd etildi. Batafsil ma’lumotlar manbada keltirilgan.