Uchrashuv nimaga bag‘ishlandi?
Transport vaziri o‘rinbosari Jasur Choriyev Vengriyaning Magnus Aircraft Zrt. kompaniyasi bosh ijrochi direktori Laszlo Boros bilan muzokara o‘tkazdi. Uchrashuv davomida aviatsiya sohasidagi hamkorlik masalalari muhokama qilindi.
Xususan, kompaniya tomonidan ishlab chiqarilayotgan Magnus Fusion 212 rusumli samolyotlarni O‘zbekistonda ishlab chiqarish imkoniyati ko‘rib chiqildi.
Magnus Aircraft qanday kompaniya?
Magnus Aircraft Zrt. kompozit materiallardan tayyorlanadigan innovatsion samolyotlarni loyihalash, ishlab chiqarish va realizatsiya qilishga ixtisoslashgan Vengriyaning xalqaro kompaniyasi hisoblanadi.
Korxonaning bosh ofisi Vengriyaning Pogani shahrida, Pech–Pogani xalqaro aeroporti yaqinida joylashgan. Ishlab chiqarish maydoni qariyb 8000 kvadrat metrni tashkil etadi.
Kompaniya qaysi davlatlarda faoliyat yuritadi?
Magnus guruhi vakillari AQSh, Xitoy, Keniya, Nigeriya, Serbiya hamda Yaqin Sharq mamlakatlarida ham faoliyat olib boradi.