Rossiya Tashqi ishlar vazirligi rasmiy vakili Mariya Zaxarova rossiyalik propagandachi va teleboshlovchi Vladimir Solovyovning Markaziy Osiyo hamda Armaniston haqidagi bayonotlari yuzasidan izoh berdi. Uning ta’kidlashicha, ushbu fikrlar Rossiya davlatining rasmiy pozitsiyasini ifodalamaydi.
Zaxarova Solovyovning Venesuela va Suriya Rossiya tashqi siyosatida Armaniston hamda Markaziy Osiyoga nisbatan ikkinchi даражали аҳамиятga эга экани ҳақидаги гаплари Москванing расмий yondashuviga mos keladimi, degan savolga javob berdi. U bu so‘zlar jurnalistning shaxsiy fikri ekanini va xususiy “Solovyov Live” kanali orqali aytilganini urg‘uladi.
10-yanvar kuni efirga uzatilgan dasturda Solovyov Markaziy Osiyoni “bizniki” deb atagan hamda Rossiya Ukrainadagi kabi Armaniston va Markaziy Osiyo davlatlarida ham “maxsus harbiy operatsiya” boshlashi kerakligi haqida fikr bildirgan edi. Shuningdek, u Armanistonning Rossiya ta’sir doirasidan chiqishini Moskva uchun “katta muammo” deb baholagan.
Zaxarovaning aytishicha, Solovyovning ushbu so‘zlari bayonot emas, balki savol shaklida ifodalangan. U ayrim jumlalar kontekstdan uzib olinib, ataylab provokatsion tarzda Rossiyaning rasmiy pozitsiyasi sifatida talqin qilinayotganini qayd etdi.
“Bu jurnalistning shaxsiy fikri bo‘lib, xususiy media platformada aytilgan. Keltirilayotgan iqtiboslar bayonot emas, savol shaklida bo‘lgan. Ayrim ‘divan tahlilchilari’ esa buni Rossiyaning rasmiy pozitsiyasi sifatida ko‘rsatishga urinmoqda. Bunday manipulyatsiyalarga yo‘l qo‘yib bo‘lmaydi”, — dedi Zaxarova.
Rossiya TIV vakili ayrim sharhlovchilar ushbu vaziyatdan foydalanib, Rossiyaning postsovet davlatlariga nisbatan go‘yoki agressiv niyatlari borligi haqidagi asossiz da’volarni tarqatayotganini ham tanqid qildi.
Zaxarova Rossiyaning rasmiy pozitsiyasi faqat vakolatli mansabdor shaxslar tomonidan bildirilishini ta’kidladi. Bu pozitsiya Rossiya prezidenti, hukumat rahbari, tashqi ishlar va mudofaa vazirlari tomonidan turli sammitlar, muzokaralar, uchrashuvlar va matbuot anjumanlarida bir necha bor bayon etilgan.
Uning so‘zlariga ko‘ra, MDH va KXShT kabi tuzilmalar doirasida muntazam muloqot olib borilmoqda va aynan shu maydonlarda Janubiy Kavkaz hamda Markaziy Osiyodagi xavfsizlik masalalari muhokama qilinmoqda.
“Rossiyani Janubiy Kavkaz va Markaziy Osiyo xalqlari bilan tarixan yaxshi qo‘shnichilik, strategik sheriklik va do‘stona munosabatlar bog‘lab turadi. O‘zaro hurmat va ishonchga asoslangan aloqalar barqaror hamkorlikning kafolatidir. Eng muhimi — provokatsiyalarga uchmaslik kerak”, — dedi Zaxarova.
Manba: Kun.uz