Bitcoin narxida nima sodir bo‘ldi?
Shanba kuni Bitcoin keskin pasayishni boshdan kechirdi. Juma kuni taxminan 84 ming dollar atrofida savdo qilingan kriptovalyuta qisqa vaqt ichida arzonlab, maqola yozilayotgan paytda 77 900 dollargacha tushdi. So‘nggi 24 soat ichida pasayish 7 foizdan oshib, narxlar 2024 yilda Donald Tramp prezident etib saylangan davrdagi darajalarga yaqinlashdi.
Bu avvalgi eng yuqori ko‘rsatkichlar bilan qanday bog‘liq?
Joriy pasayish kuchli o‘sishdan keyin yuz berdi. O‘tgan yil oktyabr oyida Bitcoin narxi 126 198 dollargacha ko‘tarilgan edi. Shundan so‘ng, Federal rezerv tizimining foiz stavkalari bo‘yicha siyosati borasidagi noaniqlik sabab investorlar xavfli aktivlardan chekinib, kriptobozo rda pasayish tendensiyasi kuzatildi.
Pasayish boshqa kriptovalyutalarga ham ta’sir qildimi?
Qulash faqat Bitcoin bilan cheklanib qolmadi. CoinDesk ma’lumotlariga ko‘ra, so‘nggi hafta davomida Ethereum, BNB, XRP va Solana kabi yirik tokenlar ham kamida 10 foizga qadrsizlandi.
Boshqa moliyaviy bozorlarda vaziyat qanday edi?
Bitcoinning pasayishi oltin narxi bilan bir vaqtda sodir bo‘ldi. Oltin hafta boshida 5 300 dollardan oshib, rekord darajaga yetgan edi, biroq Uorsh nomzodi e’lon qilingach, u ham pasayishni boshladi. Shu bilan birga, AQSh dollari mustahkamlanib, may oyidan beri eng katta o‘sishni qayd etdi, deya xabar beradi Bloomberg.
Kevin Uorsh Bitcoin haqida qanday fikrda?
Bozor reaksiyasiga qaramay, Kevin Uorsh avvalroq Bitcoinni ijobiy baholagan. U 2021 yildagi intervyusida kriptovalyutani 40 yoshdan kichiklar uchun “yangi oltin” deb atagan. 2025 yilda ham u bu fikridan qaytmay, Bitcoin uni tashvishga solmasligini va muqobil valyuta sifatida tobora kuchayib borayotganini ta’kidlagan.
Nega nomzodlik kriptobozorga bosim o‘tkazdi?
Tahlilchilarga ko‘ra, Uorshning nomzodligi qat’iy pul-kredit siyosati kutilmalarini kuchaytirdi. 10x Research asoschisi Markus Tilen CoinDesk’ga bergan izohida, Uorshning monetar intizom, yuqori real stavkalar va likvidlikni qisqartirishga urg‘u berishi kriptovalyutalarni himoya vositasi emas, balki oson pul sharoitida kuchayadigan spekulyativ aktiv sifatida ko‘rsatishini aytdi. Foiz stavkalari yuqori bo‘lib qolishi kutilganda, investorlar odatda kriptovalyutalar kabi xavfli aktivlardan chiqib, xavfsizroq investitsiyalarga yo‘naladi.