Texnikum talabalariga qanday yangi imkoniyat berildi?
24-fevral kuni yoshlar bilan uchrashuvda Prezident Shavkat Mirziyoyev texnikum talabalari ham Work and Travel dasturida qatnashib, xorijda 6 oygacha ishlashi mumkinligini e’lon qildi.
Endilikda ular oliy ta’lim muassasalari talabalari kabi chet elda ishlab, xalqaro tajriba orttirish va qo‘shimcha daromad topish imkoniga ega bo‘ladi.
Safar xarajatlari qanday qoplanadi?
Dastur ishtirokchilariga yo‘l va boshqa xarajatlarni qoplash uchun kredit ajratiladi. Oliy ta’lim talabalari uchun Work and Travel dasturi 2025 yilda joriy etilgan edi.
15-maydan boshlab chet elga ketayotgan talabalarga borish-qaytish aviachiptalari va qo‘shimcha xarajatlar uchun kredit berilmoqda. Endi ushbu mexanizm texnikum talabalariga ham tatbiq etiladi.
Dual ta’lim tizimi qanday rivojlantiriladi?
Uchrashuvda dual ta’lim tizimini yanada kengaytirish zarurligi ta’kidlandi. Texnikumlarda har oy “Karyera kuni” va bo‘sh ish o‘rinlari yarmarkalari o‘tkazilib, talabalar va ish beruvchilar o‘rtasidagi hamkorlik mustahkamlanadi.
Texnikumlar qanday yangi huquqlarga ega bo‘ladi?
Texnikumlarga oliy ta’lim muassasalari singari spin-off korxonalar tashkil etish huquqi beriladi. Shuningdek, ushbu muassasalarda talabalar startap loyihalarini qo‘llab-quvvatlash uchun 1 mlrd so‘mgacha mablag‘ ajratiladi.
Kasbiy ta’lim dasturlari qanday yangilanadi?
Mas’ul idoralar va hududiy rahbarlarga texnikumlardagi kasbiy ta’lim dasturlarini mehnat bozori talablariga moslashtirish topshirildi. Qaysi muassasalarda o‘quv rejalari yangilanishi, qayerda ilg‘or dual ta’lim tajribasi joriy etilishi va qaysi joylarda moddiy-texnik baza yaxshilanishi lozimligi aniqlanadi.
Hudud rahbarlariga texnikum binolari va yer maydonlaridan boshqa maqsadlarda foydalanishga yo‘l qo‘yilmasligi bo‘yicha ogohlantirish berildi. Shuningdek, direktorlarni asosiy vazifasiga aloqador bo‘lmagan yig‘ilishlarga chaqirmaslik belgilandi.
Modernizatsiya bo‘yicha qanday maqsad qo‘yilgan?
Hukumat har yili kamida 100 ta texnikumni to‘liq ta’mirlash va ularni zamonaviy texnologiyalar hamda mehnat bozorida talab yuqori bo‘lgan kasblarga mos jihozlashni maqsad qilgan.