AQSh prezidenti Donald Tramp federal hukumat asosiy e’tiborni mudofaani moliyalashtirishga qaratishi, sog‘liqni saqlash va bolalar bog‘chalari bilan esa shtatlar shug‘ullanishi kerakligini ma’lum qildi.
Bu bayonot qachon va qayerda yangradi?
Tramp bu fikrlarni 1 aprel kuni Pasxa bayrami munosabati bilan tashkil etilgan yopiq tushlik chog‘ida bildirgan. Nutq videosi dastlab Oq uy YouTube kanaliga joylangan, biroq keyinchalik o‘chirib tashlangan. Shunga qaramay, jurnalistlar ushbu yozuvni saqlab qolishga muvaffaq bo‘lgan.
Tramp qanday takliflarni ilgari surdi?
U o‘z chiqishida Ma’muriy-byudjet boshqarmasi rahbari Rassel Vout bilan bo‘lgan suhbatini eslab, federal darajada bolalar bog‘chalarini moliyalashtirishdan voz kechish kerakligini aytdi. Uning ta’kidlashicha, AQSh kabi yirik davlatda bunday masalalarni 50 ta shtatning o‘zi hal qilishi mumkin.
Shuningdek, u mamlakat hozir harbiy harakatlarga e’tibor qaratayotganini bildirib, “biz jang qilyapmiz, bolalar bog‘chalariga vaqt yo‘q” degan fikrni ilgari surdi. Trampga ko‘ra, sog‘liqni saqlash, Medicaid va Medicare kabi dasturlarni moliyalashtirish uchun shtatlar soliqlarni oshirishi kerak.
Oq uy bu bayonotlarga qanday izoh berdi?
Oq uy matbuot kotibi Kerolayn Livitt Tramp o‘z nutqida davlat dasturlaridagi firibgarlik masalasiga ham e’tibor qaratganini ta’kidladi. Unga ko‘ra, prezident bu sohadagi noqonuniy holatlarni kamaytirish va moliyaviy suiiste’mollarning oldini olish zarurligini urg‘ulagan.
Biroq OAV xabarlariga ko‘ra, nutqning asosiy mazmuni aynan ijtimoiy dasturlarni kim moliyalashtirishi kerakligi masalasiga qaratilgan bo‘lgan.
Bu bayonotlar xalqaro vaziyat bilan qanday bog‘liq?
Trampning ushbu fikrlari uning Eron bilan bog‘liq vaziyat yuzasidan xalqqa murojaatidan bir necha soat oldin yangragan. U o‘z nutqida AQSh g‘alabaga yaqin ekanini aytgan, biroq mojaro qachon yakunlanishini aniq ko‘rsatmagan.