2025 yil 26 dekabr kuni ADM kompaniyalar guruhiga kiruvchi ADM Jizzakh zavodi hududida yangi CKD zavodi qurilishiga rasmiy start berildi. Mazkur ishlab chiqarish maydonchasida yaqin yillarda yangi energiya manbalarida harakatlanuvchi avtomobillar (New Energy Vehicles — NEV), jumladan elektromobillar va gibrid modellarni yig‘ish rejalashtirilgan.
Ramziy vaqt kapsulasining qo‘yilishi tantanali marosimning muhim qismi bo‘lish bilan birga, O‘zbekiston avtomobilsozlik sanoati rivojida yangi bosqich boshlanganini ifodalovchi muhim voqea sifatida e’tirof etildi.
Tantanali tadbir zavod hududida bo‘lib o‘tdi va yangi CKD zavodi qurilishining boshlanishiga bag‘ishlandi. Yangi ishlab chiqarish majmuasida payvandlash, bo‘yash va yig‘ish jarayonlarini o‘z ichiga olgan to‘liq ishlab chiqarish sikli asosida xalqaro brendlarning NEV-avtomobillarini ishlab chiqarish yo‘lga qo‘yiladi. Bu esa mahalliylashtirish darajasini oshirish, zamonaviy texnologiyalarni joriy etish hamda ADM Jizzakh’ning mamlakat avtomobil sanoatidagi yetakchi mavqeini mustahkamlash imkonini beradi.
Marosimda ADM kompaniyalar guruhi rahbariyati, korxona vakillari, loyiha hamkorlari hamda mehmonlar ishtirok etdi. Tadbir davomida ADM bosh direktori Daniyar Davletiyarov tabrik so‘zi bilan chiqdi.
Uning ta’kidlashicha, ADM Jizzakh’da yangi CKD zavodining barpo etilishi nafaqat kompaniya ishlab chiqarish quvvatlarini kengaytiradi, balki butun mamlakat avtomobilsozlik sanoati rivojiga muhim hissa qo‘shadi. Xitoylik hamkorlar bilan birgalikda zamonaviy texnologiyalarga sarmoya kiritilayotgani, mahalliy yig‘ish hajmi kengaytirilayotgani va elektromobil hamda gibrid avtomobillar yo‘nalishi izchil rivojlantirilayotgani ushbu loyihaning uzoq muddatli strategik ahamiyatini aks ettiradi.
Yangi CKD zavodi ADM ishlab chiqarish klasterining tarkibiy qismi bo‘lib, elektromobillarni mayda uzelli yig‘ish uchun mo‘ljallangan zamonaviy uskunalar bilan jihozlanadi. Loyihaning amalga oshirilishi yangi ish o‘rinlari yaratish, avtomatlashtirish darajasini oshirish va mahsulotlarni xalqaro sifat standartlariga mos holda ishlab chiqarish imkonini beradi.
Mahalliylashtirish, ilg‘or texnologiyalar va o‘z sanoat bazasini rivojlantirishga ustuvor ahamiyat berayotgan ADM O‘zbekistonda avtomobil ishlab chiqarishni bosqichma-bosqich rivojlantirib kelmoqda. Vaqt kapsulasining qo‘yilishi zavod faoliyati nafaqat bugungi kun, balki butun sohaning kelajak istiqboliga qaratilganini yana bir bor namoyon etdi.