Vashington (AP) — AQSh Davlat departamenti 75 ta davlat fuqarolari uchun immigratsion vizalar ko‘rib chiqilishini vaqtincha to‘xtatishini ma’lum qildi. Ushbu qaror Donald Tramp ma’muriyati tomonidan kelajakda AQShda davlat ijtimoiy yordamiga muhtoj bo‘lishi mumkin deb baholanayotgan muhojirlar oqimini cheklash siyosati doirasida qabul qilindi.
Davlat kotibi Marko Rubio rahbarligidagi departament bayonotiga ko‘ra, konsullik xodimlariga mazkur davlatlar fuqarolaridan kelib tushayotgan immigratsion viza arizalarini ko‘rib chiqishni to‘xtatish bo‘yicha ko‘rsatma berilgan. Bu chora noyabr oyida e’lon qilingan va “public charge” mezonlarini keskinlashtirgan umumiy farmonga asoslanadi.
Mazkur cheklov 21-yanvardan kuchga kiradi va vaqtinchalik vizalarga — sayyohlik, xizmat safari yoki biznes vizalariga taalluqli emas. Aynan shu toifadagi vizalar arizalarning asosiy qismini tashkil etadi. Mutaxassislar 2026-yilgi futbol bo‘yicha Jahon chempionati hamda 2028-yilgi Olimpiya o‘yinlari AQShda o‘tkazilishi sababli noimmigratsion vizalarga talab sezilarli darajada oshishini kutmoqda.
Davlat departamenti rasmiy bayonotida ushbu siyosat AQSh immigratsiya tizimidan noto‘g‘ri foydalanishga chek qo‘yishga qaratilganini ta’kidladi. Unga ko‘ra, 75 davlat bo‘yicha immigratsion viza jarayonlari AQSh fuqarolari zimmasiga moliyaviy yuk bo‘lishi mumkin bo‘lgan chet elliklarning kirib kelishining oldini olish maqsadida qayta ko‘rib chiqiladi.
Amaldagi federal qonunchilikka binoan, doimiy yashash huquqini so‘ragan shaxslar avvaldan davlat yordamisiz yashay olishini isbotlashi talab etilgan. Biroq Donald Trampning birinchi prezidentlik davrida rad etishga sabab bo‘ladigan ijtimoiy dasturlar doirasi kengaytirilgan edi. Yangi ko‘rsatmalar bu talablarni yanada qat’iylashtirgani qayd etilmoqda.
AQShga immigratsiya qilishni istagan shaxslar elchixona tomonidan tasdiqlangan shifokor ko‘rigidan o‘tishda davom etadi. Tibbiy tekshiruv yuqumli kasalliklar, jumladan sil kasalligi, shuningdek spirtli ichimliklar yoki giyohvand moddalar iste’moli, ruhiy holat va zo‘ravonlik bilan bog‘liq tarixni o‘z ichiga oladi. Shuningdek, majburiy emlashlar talabi saqlanib qoladi.
Yangi direktiva konsullik xodimlariga arizachilarning yoshini, sog‘lig‘ini, oilaviy ahvolini, moliyaviy imkoniyatlarini, ta’lim darajasini, kasbiy ko‘nikmalarini va ilgari davlat yordami olgan-olmaganini batafsil baholashni yuklaydi. Bundan tashqari, ingliz tilini bilish darajasi ham tekshirilishi mumkin, jumladan suhbatlar ingliz tilida o‘tkazilishi ehtimoli mavjud.
Mutaxassislarning fikricha, ushbu chora-tadbirlar allaqachon qat’iylashtirilgan immigratsiya siyosati fonida AQShga doimiy yashash uchun kirish imkoniyatlarini yanada cheklashi mumkin.
Cheklov tatbiq etiladigan davlatlar ro‘yxati:
Afg‘oniston, Albaniya, Jazoir, Antigua va Barbuda, Armaniston, Ozarbayjon, Bagama orollari, Bangladesh, Barbados, Belarus, Beliz, Butan, Bosniya, Braziliya, Myanma, Kambodja, Kamerun, Kabo-Verde, Kolumbiya, Kongo, Kuba, Dominika, Misr, Eritreya, Efiopiya, Fiji, Gambiya, Gruziya, Gana, Grenada, Gvatemala, Gvineya, Gaiti, Eron, Iroq, Kot-d’Ivuar, Yamayka, Iordaniya, Qozog‘iston, Kosovo, Quvayt, Qirg‘iziston, Laos, Livan, Liberiya, Liviya, Shimoliy Makedoniya, Moldova, Mongoliya, Chernogoriya, Marokash, Nepal, Nikaragua, Nigeriya, Pokiston, Kongo Respublikasi, Rossiya, Ruanda, Sent-Kitts va Nevis, Sent-Lyusiya, Sent-Vinsent va Grenadinlar, Senegal, Syerra-Leone, Somali, Janubiy Sudan, Sudan, Suriya, Tanzaniya, Tailand, Togo, Tunis, Uganda, Urugvay, O‘zbekiston, Yaman.