Buxoro viloyatida sifatsiz yonilg‘i tufayli avtomobilida nosozlik yuzaga kelgan iste’molchining deyarli 14,4 million so‘mlik zarari qoplab berildi. Bu haqda Raqobatni rivojlantirish va iste’molchilar huquqlarini himoya qilish qo‘mitasi xabar berdi.
Ma’lum qilinishicha, qo‘mita hududiy boshqarmasi fuqaroning “Narzulloobod Javohiri” XK yonilg‘i quyish shoxobchasidan xarid qilingan 10 litr Ai-95 benzin sabab avtomobilida nosozlik paydo bo‘lgani haqidagi murojaatini ko‘rib chiqqan. Servis xulosasi asosida maxsus komissiya korxonaga nisbatan ish qo‘zg‘atib, yetkazilgan 14,4 million so‘mlik zarar iste’molchiga qoplab berilishini ta’minlagan.
Qo‘mita, shuningdek, avtomobil yetkazib berish, xarid qilish va kafolatli servis xizmatlari bo‘yicha kelib tushgan murojaatlar yuzasidan boshqa holatlar bo‘yicha ham ma’lumot berdi.
Jizzax viloyatida Chevrolet Tracker Premier Plus avtomobilidagi dvigatel nuqsoni aniqlangach, transport vositasi xuddi shu qiymatdagi yangi avtomobilga almashtirib berildi.
Qashqadaryo viloyatida to‘loviga qaramay o‘z vaqtida yetkazilmagan Cobalt avtomobili egasiga topshirilishi ta’minlandi.
Navoiy viloyatida Onix avtomobilining old eshik qoplamasidagi nuqsonlar bartaraf etildi hamda nosoz akkumulyator sifatlisiga almashtirildi.
Samarqand viloyatida belgilangan muddatda yetkazilmagan Cobalt bo‘yicha fuqaro murojaati ko‘rib chiqilib, avtomobil qisqa muddatda topshirildi.
Surxondaryo viloyatida 173 mln so‘mlik Chery avtomobilida qisqa muddatda yuzaga kelgan nosozlik avtosalon tomonidan to‘liq ta’mirlab berildi.
Toshkent viloyatida kafolatdagi Kia Sonet avtomobilida aniqlangan texnik nosozlik bartaraf etildi va moy hamda filtr bepul almashtirib berildi.
Toshkent shahrida nuqsonli Damas-2 D2 Style Plus avtomobili sifatlisiga almashtirib berildi.