Eron bo‘ylab davom etayotgan hukumatga qarshi norozilik namoyishlarini kuch bilan bostirish oqibatida minglab odamlar halok bo‘lgan bo‘lishi mumkin. Bir necha kundan so‘ng ilk bor xorijdagi yaqinlari bilan bog‘lana olgan eronliklar o‘lim va vayronagarchiliklar dahshatli miqyosda ekanini aytishmoqda.
Reuters axborot agentligiga gapirgan Eron xavfsizlik tizimidagi manbaning ma’lum qilishicha, qurbonlar soni taxminan 2 000 kishiga yetishi mumkin. Bu raqam ichiga xavfsizlik kuchlari vakillari ham kiradi.
Hengaw Inson Huquqlari Tashkiloti xabariga ko‘ra, o‘tgan payshanba kuni hibsga olingan 26 yoshli namoyishchi Efran Sultoniy ertaga qatl etilishi mumkin. Tashkilot vakillari bu holatni “ishlar bu qadar tez harakatlanganini ilgari ko‘rmaganmiz”, deb baholagan.
Mamlakatda norozilik namoyishlari bir necha haftadan beri davom etmoqda. Davlat OAVlari kecha tunda vaziyat tinchlangani haqida xabar bergan bo‘lsa-da, BBCga yuborilgan videoyozuvlarda turli hududlarda noroziliklar davom etgani ta’kidlanadi.
Qonli bostirishlarga javoban AQSh prezidenti Donald Tramp Eron bilan savdo qilayotgan davlatlar AQSh bilan savdoda 25 foizlik boj to‘loviga duch kelishini ma’lum qildi.
BBC’ning AQShdagi hamkori CBS ma’lumotiga ko‘ra, Trampning milliy xavfsizlik bo‘yicha jamoasi Oq uyda Eron masalasida ehtimoliy choralarni muhokama qilish uchun yig‘ilish o‘tkazishi kutilmoqda. Prezidentga harbiy va maxfiy vositalarni o‘z ichiga olgan turli ssenariylar taqdim etilgan.
Shu bilan birga, Eron tashqi ishlar vaziri mamlakat “har qanday harakatga tayyor” ekanini bildirgan. Germaniya kansleri Fridrix Merts esa Yevropa davlatlari eronlik elchilarni chaqirib olayotgan bir paytda, dunyo “Eron rejimining so‘nggi kunlari va haftalariga guvoh bo‘layotganini” ta’kidladi.
Ayrim hududlarda xalqaro qo‘ng‘iroqlarga ruxsat berila boshlaganiga qaramay, davom etayotgan internet blokadasi mamlakat ichidagi holatni mustaqil tasdiqlashni hanuz qiyinlashtirmoqda.
Manbalar: BBC News, Reuters, CBS News.