Ma’muriy ogohlantirish nimani anglatadi?
Yangi tartibga muvofiq, ma’muriy ogohlantirish — huquqbuzarlik sodir etgan shaxsni qonunga xilof xatti-harakatlarga yo‘l qo‘ymaslik haqida rasmiy ogohlantirish va unga tanbeh berish chorasi hisoblanadi. Ushbu chora profilaktik ahamiyatga ega.
Ogohlantirish qanday shaklda qo‘llanadi?
Ma’muriy ogohlantirish yozma yoki elektron shaklda rasmiylashtiriladi. U jarima o‘rniga qo‘llanadi va haydovchini kelgusida yo‘l harakati qoidalariga rioya qilishga undashga qaratilgan.
Qaysi qoidabuzarliklar uchun ogohlantirish beriladi?
Ushbu ma’muriy chora Ma’muriy javobgarlik to‘g‘risidagi kodeksning 125-moddasi 1 va 2-qismlari, 128-(prim 1), 128-(prim 2), 128-(prim 6), 135-(prim 1), shuningdek 138-moddasining 1 va 2-qismlarida nazarda tutilgan huquqbuzarliklar uchun qo‘llanishi mumkin.
Qanday holatda jarima emas, ogohlantirish beriladi?
Agar haydovchi o‘z qilmishidan chin ko‘ngildan pushaymon bo‘lsa va qoidabuzarlikda og‘irlashtiruvchi holatlar yoki boshqa huquqbuzarlik alomatlari mavjud bo‘lmasa, vakolatli organ tomonidan unga ma’muriy ogohlantirish beriladi.
Ma’muriy ogohlantirish necha marta qo‘llanadi?
Qonunchilikka ko‘ra, ma’muriy ogohlantirish bir shaxsga nisbatan bir yil davomida faqat bir marta qo‘llanishi mumkin. Bu me’yor ushbu choradan noo‘rin foydalanishning oldini olishga qaratilgan.
Yangi tartib haydovchilar uchun nimani anglatadi?
Yangi ma’muriy tartib haydovchilarga ilk bor yoki yengil qoidabuzarlik sodir etilganda moliyaviy jarimasiz ogohlantirish olish imkonini beradi. Bu esa yo‘l harakati xavfsizligini oshirishga xizmat qiladi.