Vizasiz rejim qanday ishlaydi?
2025-yildan boshlab O‘zbekiston fuqarolari Xitoyga qisqa muddatli va aniq maqsadli safarlar — turizm yoki biznes uchun vizasiz kirish imkoniga ega. Ta’lim olish, ishlash yoki uzoq muddat yashash uchun esa ushbu tartib amal qilmaydi — bunday hollarda elchixona orqali oldindan viza rasmiylashtirish zarur.
Qancha muddat qolish mumkin?
Qoidalar oddiy: har bir safar uchun 30 kungacha, har qanday 6 oylik davr ichida jami 90 kungacha qolish mumkin. Safarlar soni cheklanmagan — hisob faqat Xitoy hududida o‘tkazilgan umumiy kunlar bo‘yicha yuritiladi.
Masalan:
1-yanvar — 30-yanvar: 30 kun
15-fevral — 16-mart: yana 30 kun
1-aprel — 30-aprel: yana 30 kun
Jami: 90 kun.
1-maydan boshlab vizasiz kirish imkoni tugaydi, chunki limit to‘liq ishlatilgan bo‘ladi. Olti oylik davr ichidan yanvar kunlari chiqib ketgach, bo‘shagan kunlardan yana foydalanish mumkin, biroq bir safar 30 kundan oshmasligi kerak.
Shuningdek, materik Xitoyni Gonkong va Makao bilan adashtirmaslik muhim — O‘zbekiston fuqarolari uchun vizasiz rejim ularga tatbiq etilmaydi, alohida viza talab qilinadi.
Chegarada qanday hujjatlar tekshiriladi?
Vizasiz kirishda ham chegara xodimlari safar maqsadini va mamlakatni o‘z vaqtida tark etishga tayyorgarlikni tekshirishi mumkin. Quyidagi hujjatlarni yoningizda saqlash muhim:
- Kamida 6 oy amal qiladigan pasport
- Qaytish bileti
- Mehmonxona bron tasdig‘i
- Mablag‘ yetarliligini tasdiqlovchi hujjat (bank ma’lumotnomasi)
- Kirish/chiqish migratsiya kartasi
Migratsiya kartasi nima va uni qanday to‘ldirish kerak?
Xitoyga kirishda, hatto vizasiz rejimda ham migratsiya kartasi to‘ldiriladi. U pasport nazoratidan oldin — qog‘oz shaklida yoki aeroportdagi elektron terminal orqali rasmiylashtiriladi. Oldindan onlayn to‘ldirish imkoniyati ham mavjud, ammo qog‘oz shakli ishonchliroq hisoblanadi.
Kartada safar maqsadi, yashash manzili va qolish muddati ko‘rsatiladi. U qisqa muddatli va ruxsat etilgan maqsad bilan kirayotganingizni tasdiqlaydi.
Maqsad sifatida faqat ruxsat etilgan variantlarni ko‘rsating: Tourism — sayyohlik, Business — biznes. Manzil sifatida birinchi mehmonxona yoki mezbon manzilini yozish kifoya. “Keyin hal qilaman” kabi javoblar qo‘shimcha savollarga sabab bo‘lishi mumkin.
Qolish muddati sifatida maksimal 30 kunni ko‘rsatish shart emas — agar 7–10 kun qolishni rejalashtirsangiz, shuni yozing.
Kirishdan keyin ro‘yxatdan o‘tish shartmi?
O‘zbekiston fuqarolari Xitoyga kirgandan so‘ng 24 soat ichida yashash joyi bo‘yicha ro‘yxatdan o‘tishi kerak. Aks holda kuniga 500 yuan (taxminan 882 000 so‘m) jarima qo‘llanishi mumkin.
Mehmonxona ushbu jarayonni avtomatik bajaradi. Ijara kvartirada yashasangiz, ro‘yxatdan o‘tishni mustaqil ravishda — politsiya bo‘limida yoki onlayn amalga oshirish lozim. Turar joy o‘zgarsa yoki Gonkong/Makao orqali qayta kirilsa, qayta ro‘yxatdan o‘tish talab qilinadi.
Toshkentdan Xitoyga qanday borish mumkin?
Toshkentdan Pekin, Guanchjou va Xaynan yo‘nalishlariga to‘g‘ridan-to‘g‘ri reyslar mavjud. Uzbekistan Airways, Air China va China Southern Airlines muntazam qatnovlarni amalga oshiradi. Bir tomonlama chipta narxi o‘rtacha 2,6–2,9 mln so‘m atrofida.
Sanya (Xaynan) yo‘nalishiga ham to‘g‘ridan-to‘g‘ri reyslar va charter qatnovlar bor, ayniqsa mavsum davrida tez-tez amalga oshiriladi. Narxlar odatda 2,8 mln so‘mdan boshlanadi.
Xitoyda qaysi ilovalar kerak bo‘ladi?
Xitoyda ko‘plab xalqaro servislar ishlamaydi. Safardan oldin quyidagi ilovalarni o‘rnatish tavsiya etiladi:
- WeChat — aloqa va to‘lovlar uchun
- Alipay — mobil to‘lovlar
- Baidu Maps yoki Amap — navigatsiya
- DiDi — taksi chaqirish
- Translator — tarjima uchun
Google, Instagram, WhatsApp va Telegram bloklangan. Zarur bo‘lsa, VPN’ni safardan oldin o‘rnating.
Xitoyda qanday to‘lash mumkin?
Xitoy to‘lov tizimi o‘ziga xos. UnionPay — milliy to‘lov tizimi bo‘lib, terminal va naqd pul yechishda qulay. Visa va Mastercard asosan yirik mehmonxonalar va sayyohlik hududlarida ishlaydi.
Eng keng tarqalgan to‘lov usuli — Alipay va WeChat Pay orqali QR-kod asosida to‘lov qilish. Kundalik hayotda mobil to‘lovsiz yurish qiyin.
1 yuan taxminan 1700–1800 so‘mga teng. Naqd dollarni almashtirish murakkab bo‘lishi mumkin, shuning uchun aeroportda yoki banklarda amalga oshirish tavsiya etiladi.
Muddatdan ortiq qolinsa nima bo‘ladi?
Xitoyda ruxsat etilgan muddatdan ortiq qolish migratsiya qoidalarini buzish hisoblanadi, hatto bir necha kun bo‘lsa ham. Bu jarima (kuniga 500 yuan), kelgusida viza olishda muammolar, deportatsiya yoki vaqtinchalik kirish taqiqiga olib kelishi mumkin.