O‘zbekiston Respublikasi Prezidentining “Mahalliy yengil sanoat korxonalarining xalqaro yetkazib berish zanjirlarida ishtirokini kengaytirish hamda tashqi bozorlarda o‘rnini mustahkamlashga qaratilgan chora-tadbirlar to‘g‘risida”gi PF–4-son Farmoni (12.01.2026 y.) qabul qilindi. Ushbu hujjat yengil sanoat tarmog‘ini moliyaviy jihatdan sog‘lomlashtirishga qaratilgan tizimli islohotlarni nazarda tutadi.
Farmonga muvofiq, to‘qimachilik korxonalari iqtisodiy va moliyaviy holatidan kelib chiqqan holda “yashil”, “sariq” va “qizil” toifalarga ajratiladi. Mazkur toifalash asosida korxonalar faoliyatini qo‘llab-quvvatlash bo‘yicha manzilli dastur amalga oshiriladi.
Hujjat doirasida quyidagi imkoniyatlarga ruxsat etiladi:
- tijorat banklari tomonidan 2 mln AQSh dollarigacha bo‘lgan kreditlarni Yengil sanoatni rivojlantirish agentligi resurslari hisobidan ajratish, bunda garov sifatida korxonalar tomonidan xarid qilingan va to‘lovi to‘liq amalga oshirilgan yoki o‘zlari yetishtirgan xomashyo qabul qilinadi;
- moliyaviy sog‘lomlashtirish imkoniyati mavjud deb topilgan korxonalarning avval olingan tijorat kreditlari muddatini 7 yilgacha uzaytirish;
- paxta xomashyosi xaridi uchun jalb qilingan kreditlar bo‘yicha 2026–2027 yillarda yanvar–fevral oylariga belgilangan to‘lovlarni kredit shartnomasiga asosan oxirgi 6 oyga teng ulushlarda taqsimlab to‘lash.
Mazkur chora-tadbirlar yengil sanoat korxonalarining moliyaviy barqarorligini oshirish, ularning eksport salohiyatini kuchaytirish hamda xalqaro bozorlarda raqobatbardoshligini mustahkamlashga xizmat qiladi.