AQSh ma’muriyati Qo‘shma Shtatlarga kirish uchun viza olish jarayonida moliyaviy garov puli to‘lash talab etiladigan davlatlar ro‘yxatini kengaytirdi. Endilikda ushbu ro‘yxatga kiritilgan mamlakatlar soni 13 taga yetdi, ularning 11 tasi Afrika qit’asida joylashgan.
AQSh Davlat departamenti o‘tgan hafta Bxutan, Botsvana, Markaziy Afrika Respublikasi, Gvineya, Gvineya-Bisau, Namibiya va Turkmanistonni mazkur ro‘yxatga qo‘shdi. travel.state.gov saytida e’lon qilingan xabarga ko‘ra, yangi talablar 1-yanvardan kuchga kirgan.
Ushbu choralar AQShga kirish qoidalarini yanada qat’iylashtirishga qaratilgan siyosatning bir qismi hisoblanadi. Jumladan, viza talab qilinadigan barcha davlatlar fuqarolari shaxsiy suhbatdan o‘tishi, ijtimoiy tarmoqlardagi ko‘p yillik faolligi haqida ma’lumot taqdim etishi hamda o‘zlari va oila a’zolarining avvalgi safarlari va yashash joylari bo‘yicha batafsil axborot berishi shart.
AQSh rasmiylarining ta’kidlashicha, 5 000 dollardan 15 000 dollargacha bo‘lgan garov puli tizimi viza muddati buzilishining oldini olishda samarali hisoblanadi. Shu bilan birga, garov pulining to‘lanishi vizaning berilishini kafolatlamaydi.
Agar viza berish rad etilsa, garov puli to‘liq qaytariladi. Shuningdek, viza egasi AQShda bo‘lish shartlariga rioya qilganini tasdiqlaganidan so‘ng ham ushbu mablag‘ qaytarib beriladi.
Yangi qo‘shilgan davlatlar ilgari ro‘yxatga kiritilgan Mavritaniya, San-Tome va Prinsipi, Tanzaniya, Gambiya, Malavi va Zambiya qatoriga qo‘shildi. Ushbu mamlakatlar o‘tgan yilning avgust va oktyabr oylarida belgilangan edi.
Manba: US expands list whose citizens must pay bond to seek a visa | AP News
https://share.google/NZRmMVdpkh43hBwmL