Dunyo miqyosida oltin ishlab chiqarish hajmi bo‘yicha to‘rtinchi yirik kompaniya hisoblangan Navoiy kon-metallurgiya kombinati (NKMK) 2025 yil yakunlari bo‘yicha asosiy ishlab chiqarish va moliyaviy ko‘rsatkichlarini e’lon qildi.
Hisobotga ko‘ra, kompaniya tomonidan yil davomida 3 mln 156,6 ming troy unsiya yoki 98,2 tonna oltin ishlab chiqarilgan. Mazkur natija 2024 yilda qayd etilgan ko‘rsatkichdan (3 mln 91,1 ming unsiya) 2,1 foizga yuqori.
Jahon bozorida oltin narxlarining oshishi fonida 2025 yilda NKMK tomonidan ishlab chiqarilgan mahsulotning umumiy qiymati 135,6 trln so‘mni (taxminan 11 mlrd AQSh dollaridan ortiq) tashkil etdi. Bu 2024 yildagi 93,9 trln so‘mlik ko‘rsatkichga nisbatan 44,4 foizga ko‘p.
Investitsiya dasturi doirasida hisobot yilida jami 561 mln AQSh dollari miqdoridagi mablag‘lar o‘zlashtirildi. Shu bilan birga, investitsiyalar hajmi avvalgi yilga nisbatan 29 foizga kam bo‘ldi.
Yangi investitsiya loyihalarini amalga oshirish hamda mavjud ishlab chiqarish quvvatlarini kengaytirish hisobiga 2 628 ta yangi ish o‘rni yaratildi. Mahalliylashtirish dasturi doirasida 1,4 trln so‘mlik mahsulot ishlab chiqarildi, tarmoqlararo sanoat kooperatsiyasi orqali esa 7,3 trln so‘mlik mahsulot xarid qilindi.
2025 yil davomida kompaniya rahbariyati tarkibida ham o‘zgarishlar amalga oshirildi. Mehnat shartnomasi muddati yakunlanishi va tomonlarning kelishuviga ko‘ra, 2025 yil 31 dekabrdan boshlab bosh direktorning transformatsiya bo‘yicha birinchi o‘rinbosari hamda boshqaruv a’zosi Yevgeniy Aleksandrovich Antonov lavozimidan ozod etildi.
2026 yil 1 yanvardan e’tiboran Jahongir Tolibovich Hasanov NKMK bosh direktorining moliya, transformatsiya va xususiylashtirish bo‘yicha birinchi o‘rinbosari hamda boshqaruv a’zosi lavozimiga tayinlandi. U tayinlovga qadar bosh direktorning iqtisod va moliya bo‘yicha o‘rinbosari sifatida faoliyat yuritgan.
Ma’lumot uchun, NKMK boshqaruv raisi — bosh direktori lavozimini 2008 yildan buyon Quvondiq Sanaqulov egallab kelmoqda.
Hozirda kombinat tarkibida 12 ta kon, 7 ta gidrometallurgiya zavodi hamda 2 ta uyumdan eritmaga o‘tkazish sexi faoliyat yuritmoqda.
2025 yil dekabr oyining oxirida O‘zbekiston Prezidenti Shavkat Mirziyoyev 2030 yilga qadar mamlakatda oltin ishlab chiqarish hajmini 175 tonnaga yetkazish rejalashtirilayotganini ma’lum qilgan.
Shuningdek, Prezidentning 2025 yil aprel oyidagi farmoniga muvofiq, NKMK 2025 yilning ikkinchi yarmida mahalliy va xalqaro fond bozorlarida IPO o‘tkazib, kompaniya aksiyalarining 10–15 foizini ochiq bozorga chiqarishi belgilangan.
Manba: Reuters