Ijtimoiy tarmoqlarda tarqatilgan yolg‘on ma’lumot nimaga olib keldi?
Toshkent shahrida o‘zini malakali kosmetolog sifatida ko‘rsatib kelgan ayolning faoliyati fosh etildi. Sud jarayonida uning kosmetologiya sohasida maxsus ma’lumoti ham, amaliyot o‘tkazish uchun litsenziyasi ham yo‘qligi aniqlandi. Shuningdek, u ilgari ham jinoyat sodir etgan va xavfli retsidivist sifatida qayd etilgan.
Mijoz qanday yo‘l bilan ishontirilgan?
M.G. ijtimoiy tarmoqlar orqali kosmetologik muolajalar va jarrohlik amaliyotlarini bajarish huquqiga egaligi, ushbu yo‘nalishda katta tajribasi borligi haqida asossiz va yolg‘on ma’lumotlar tarqatgan. Shu tariqa u 25 yoshli M.B.ni ko‘krak va dumba sohalarini kattalashtirish muolajasiga ko‘ndirgan.
Muolaja vaqtida qanday qonunbuzarlik sodir etilgan?
Ayol sertifikatga ega bo‘lmagan va tibbiy jihatdan ruxsat etilmagan biogelni inʼeksiya qilgan. Ushbu “xizmat” evaziga u jabrlanuvchidan 1 200 AQSh dollari olgan. Muolajaning noto‘g‘ri bajarilishi, anatomik bilimlarning yetishmasligi va professional ko‘nikmalarning yo‘qligi salbiy oqibatlarga sabab bo‘lgan.
Sud-tibbiy ekspertiza nimalarni aniqladi?
Ekspertiza xulosasiga ko‘ra, jabrlanuvchining o‘ng va chap ko‘krak bezlari sohalarida gel inʼeksiyasidan keyingi hosilalar, shuningdek, dumba sohasida muolajadan keyingi chandiqlar aniqlangan. Ushbu holatlar o‘rtacha og‘irlikdagi tan jarohati yetkazilganini tasdiqlagan.
Bunday muolajalar kim tomonidan bajarilishi kerak?
Mutaxassislar xulosasiga ko‘ra, ko‘krak va dumba sohalariga oid inʼeksion muolajalar faqat plastik jarroh, shifokor-dermatolog yoki dermatokosmetolog tomonidan bajarilishi lozim.
Sud qanday hukm chiqardi?
Sud M.G.ni Jinoyat kodeksining 168-moddasi 3-qismi “b” bandi (firibgarlik) hamda 186-moddasi 2-qismi “g” bandi (xavfsizlik talablariga javob bermaydigan xizmatlar ko‘rsatish) bilan aybli deb topdi. Unga 150 million so‘m miqdorida jarima jazosi tayinlanib, mablag‘ davlat foydasiga undirilishi belgilandi.
Ilgari ham sudlanganmi?
Aniqlanishicha, M.G. avval ham shu turdagi firibgarlik jinoyati uchun javobgarlikka tortilgan. Xususan, 2024 yil 7 iyunda Mirobod tuman sudi hukmi bilan u aybli deb topilgan va xavfli retsidivist sifatida baholangan.
Jarima qanday undirilmoqda?
Majburiy ijro byurosi matbuot xizmati ma’lumotiga ko‘ra, jarimani undirish jarayonida M.G.ga tegishli Tracker 2 rusumli avtomobil aniqlangan. Qidiruv tadbirlaridan so‘ng ushbu transport vositasi xatlanib, jarima maydonchasiga joylashtirilgan.