Birlashgan Arab Amirliklari Prezidenti Shayx Muhammad bin Zoid Ol Nahayon O‘zbekiston Respublikasining BAA dagi Favqulodda va Muxtor Elchisi Abdulaziz Akkulovni mamlakatdagi diplomatik missiyasi muvaffaqiyatli yakunlangani munosabati bilan Mustaqillik ordenining birinchi darajasi bilan taqdirladi.
Dunyo nashrining xabar berishicha, yuksak davlat mukofoti Birlashgan Arab Amirliklari Tashqi ishlar vazirligida bo‘lib o‘tgan rasmiy uchrashuv davomida davlat vaziri Said bin Muborak Al Hojari tomonidan tantanali ravishda topshirildi.
Uchrashuv chog‘ida O‘zbekiston va Birlashgan Arab Amirliklari o‘rtasidagi ikki tomonlama hamkorlikning dolzarb masalalari muhokama qilinib, hamkorlikni barcha yo‘nalishlarda yanada rivojlantirishga bo‘lgan qat’iy intilish qayd etildi.
Said bin Muborak Al Hojari Abdulaziz Akkulovning elchilik faoliyati davomida ikki davlat o‘rtasidagi munosabatlarni mustahkamlashga qo‘shgan hissasini yuqori baholab, uning o‘zaro manfaatli aloqalarni kengaytirishdagi muhim rolini alohida ta’kidladi hamda kelgusidagi faoliyatida muvaffaqiyatlar tiladi.
O‘z navbatida Abdulaziz Akkulov BAA Prezidenti Shayx Muhammad bin Zoid Ol Nahayonga bildirilgan yuksak e’tibor va e’tirof uchun chuqur minnatdorlik bildirdi. U ikki tomonlama munosabatlarda erishilgan yutuqlar va ijobiy o‘sish sur’atlari BAA rahbariyatining mamlakatning xalqaro maydondagi nufuzini mustahkamlashga qaratilgan qat’iy siyosatini aks ettirishini ta’kidladi.
Uchrashuv yakunida diplomat O‘zbekiston va BAA o‘rtasidagi aloqalarni mustahkamlashga xizmat qilgan samarali hamkorlik uchun barcha davlat idoralariga o‘z minnatdorligini bildirdi.
Eslatib o‘tamiz, Abdulaziz Akkulov avvalroq O‘zbekiston Respublikasining Turizm qo‘mitasi raisi lavozimiga tayinlangan.