O‘zbekiston Milliy istiqbolli loyihalar agentligi (NAPP) Xitoyning Temu internet bozori faoliyati yuzasidan rasmiy izoh berdi. Unga ko‘ra, platforma mamlakatda normal faoliyatini tiklashi uchun katta miqdordagi soliq qarzini to‘lashi zarur.
Temu qancha soliq qarzdor?
18 mart kuni o‘tkazilgan matbuot anjumanida NAPPning elektron tijoratni rivojlantirish va tartibga solish bo‘limi rahbari Kamronbek Muxammadiev Temu taxminan 46 milliard so‘m soliqdan qarzdor ekanini ma’lum qildi.
Kursiv Media xabariga ko‘ra, rasmiy Temuning hozirgi faoliyati O‘zbekiston iqtisodiyotiga foyda keltirayaptimi degan savolga “Mutlaqo yo‘q” deb javob bergan.
Muzokaralar nima uchun natija bermadi?
NAPP ma’lumotiga ko‘ra, Temu vakillari, jumladan vitse-prezident boshchiligidagi delegatsiya agentlikka olti marotaba tashrif buyurgan. Uchrashuvlarda Soliq qo‘mitasi va boshqa tashkilotlar tomonidan barcha qonunchilik talablari batafsil tushuntirilgan.
“Har safar bir xil narsani tushuntiramiz — hammasi ochiq va aniq. Qancha, qachon va qanday to‘lash kerakligini hujjatlar bilan ko‘rsatdik. Ular rozi bo‘lib, keyin g‘oyib bo‘lishadi. Bu holat olti marta takrorlandi”, — dedi Muxammadiev.
Cheklovlar foydalanuvchilarga qanday ta’sir qildi?
Platforma bloklangach, xaridlar hajmi taxminan 95 foizga kamaydi. Faqat 5 foiz foydalanuvchilar VPN orqali kirib, Visa va Mastercard kabi xalqaro to‘lov tizimlaridan foydalanmoqda.
Biroq bu ham xavfsiz emas. Ayrim mijozlar to‘lov qilgan bo‘lsa ham, buyurtmalar yetib bormayotgani qayd etilgan. Sotuvlar kamaygani sababli logistika xarajatlari ham keskin oshgan.
Muammo qachon boshlangan?
Muammolar 2024 yil oxirida boshlangan bo‘lib, o‘sha paytda O‘zbekistonda yangi qoidalar joriy etilib, xorijiy e-commerce platformalaridan mamlakatda yuridik shaxs sifatida ro‘yxatdan o‘tish talab qilingan.
Temu hozirda ro‘yxatdan o‘tgan bo‘lsa-da, ro‘yxatdan o‘tishdan oldingi davr uchun yig‘ilgan soliqlarni to‘lamagani sababli bloklash saqlanib qolmoqda.
Temu qachon yana ish boshlashi mumkin?
Hozirda NAPP va Soliq qo‘mitasi platforma bilan muzokaralarni davom ettirmoqda. Rasmiylar Temu barcha qonuniy talablarni bajargan taqdirdagina faoliyatini tiklashiga ruxsat berilishini ta’kidladi.
“To‘p ularning maydonida. Biz ochiqmiz, ammo hamma qonunga bo‘ysunishi shart”, — deya yakunladi Muxammadiev.