Moldova hukumati mamlakatning Mustaqil Davlatlar Hamdo‘stligi (MDH)dagi a’zoligiga asos bo‘lib kelgan uchta muhim kelishuvni bekor qilish jarayonini rasman boshladi. Tashqi ishlar vaziri Mixay Popshoyning ta’kidlashicha, ushbu qaror MDHdan huquqiy jihatdan chiqishni anglatadi, de-fakto a’zolik esa avvalroq to‘xtatilgan.
Vazir 19-yanvar, dushanba kuni Radio Moldova efirida so‘zlagan nutqida, kelishuvlar o‘z kuchini yo‘qotgach, Moldova rasmiy va yuridik jihatdan MDH tarkibiga kirmasligini bildirdi. Uning so‘zlariga ko‘ra, amaliy ishtirok allaqachon yakunlangan edi.
Bosh vazir o‘rinbosari va TIV rahbari bekor qilinayotgan hujjatlar qatoriga 1993-yil 22-yanvarda Minsk shahrida imzolangan MDH nizomi, 1991-yil 8-dekabrdagi MDHni tashkil etish to‘g‘risidagi bitim hamda ushbu bitimga 1991-yil 22-dekabrda qabul qilingan ilova kirishini aniqlik kiritdi.
Popshoyning aytishicha, denonsatsiya jarayoni allaqachon boshlangan bo‘lib, tegishli hujjatlar yangi parlament sessiyasining ilk kunlaridayoq deputatlar tomonidan ko‘rib chiqiladi. Uning ma’lum qilishicha, hukumat darajasidagi barcha tartib-taomillar fevral o‘rtalariga qadar yakunlanishi mumkin, shundan so‘ng qaror parlament tomonidan qabul qilinadi.
Tashqi ishlar vaziri MDH bilan bog‘liq kelishuvlarni bekor qilishni Moldovaning Yevropa yo‘nalishini mustahkamlash yo‘lidagi muhim qadam sifatida baholadi. Unga ko‘ra, Moldova MDH doirasida jami 283 ta kelishuvni imzolagan bo‘lib, ulardan 71 tasi allaqachon bekor qilingan, yana taxminan 60 tasi denonsatsiya jarayonida.
Shu bilan birga, Popshoy Kishinyov Yevropa integratsiyasi yo‘liga zid bo‘lmagan, iqtisodiy foyda keltiradigan yoki fuqarolar uchun amaliy ahamiyatga ega bo‘lgan kelishuvlardan voz kechish niyatida emasligini alohida ta’kidladi.