2025 йил 30 декабрь куни Ўзбекистон Республикаси Президенти Шавкат Мирзиёев томонидан имзоланган фармонга мувофиқ, иқтисодиётнинг бир қатор устувор йўналишларини қўллаб-қувватлашга қаратилган янги божхона ва солиқ имтиёзлари жорий этилмоқда. Мазкур чора-тадбирлар 2026 йил 1 январдан амалга киритилади.
Божхона божидан озод этиш (2026–2028 йиллар)
2026 йил 1 январдан 2028 йил 1 январга қадар белгиланган тартибда тасдиқланадиган рўйхатлар асосида Ўзбекистон ҳудудига олиб кириладиган айрим товарлар божхона божидан озод қилинади.
Ушбу имтиёзлар электромобилларни қувватлантириш станциялари, уларнинг бутловчи қисмлари ҳамда қувватлаш инфратузилмасини ташкил этиш ва хизмат кўрсатиш учун мўлжалланган технологик асбоб-ускуналарга татбиқ этилади. Имтиёзга кирувчи аниқ ускуналар ва компонентлар рўйхати алоҳида тартибда тасдиқланади.
Шунингдек, икки йил давомида пилла йигириш ва ипак газлама тўқиш дастгоҳларининг эҳтиёт қисмлари учун ҳам божхона божидан озод этиш чоралари қўлланилади. Бундан ташқари, тут дарахти уруғлари ва кўчатлари, шунингдек, ипак қуртининг саноат, элита ва суперэлита уруғлари импорти ҳам божхона тўловларидан озод қилинади.
Чиқиндиларни бошқариш соҳаси учун солиқ имтиёзлари (2026–2031 йиллар)
Фармонга мувофиқ, чиқиндиларни бошқариш ва санитария соҳасида фаолият юритувчи ташкилотлар учун узоқ муддатли солиқ имтиёзлари белгиланди. 2026 йил 1 январдан 2031 йил 1 январгача “Чиқинди полигонларини бошқариш дирекцияси” давлат муассасаси ҳамда белгиланган талабларга жавоб берадиган корхоналар учун фойда солиғи ва ижтимоий солиқ ставкаси 1 фоиз миқдорида белгиланади.
Ушбу солиқ имтиёзларини қўллаш учун корхонанинг ҳисобот (солиқ) давридаги жами даромадининг камида 90 фоизи чиқиндиларни тўплаш, олиб чиқиш, саралаш ва қайта ишлаш фаолиятидан шаклланиши лозим.
Шу билан бирга, ҳар бир ходимга ҳисобланган ойлик иш ҳақи миқдори меҳнатга ҳақ тўлашнинг энг кам миқдорининг икки бараваридан кам бўлмаслиги шарт. Амалда ушбу кўрсаткич 2,542 млн сўм этиб белгиланган.
Мазкур қарорлар инвестицияларни жалб этиш, устувор тармоқларни модернизация қилиш, экологик барқарорликни таъминлаш ҳамда муносиб иш ҳақи асосида янги иш ўринларини яратишга хизмат қилади.